Skýjað með snjalltækjum á köflum

Það hefur naumast farið fram hjá nokkrum manni að þróun í farsímatækni hefur verið afar hröð að undanförnu. Í stað „gömlu takkasímanna“ sem unga fólkið notaði einnig til að senda stöku smáskilaboð eru komnir snjallsímar sem skilja flestar borðtölvur síðasta áratugar eftir með ryk í geisladrifinu.

Framþróun síðustu ára í örtölvutækni, skjátækni, landupplýsingakerfum, staðsetningatækni, gagnaflutnigsgetu fjarskiptakerfa og á fleiri sviðum hefur opnað nýjar gáttir á sviði afþreyingar, fjölmiðlunar, greiðslumiðlunar, ferðaþjónustu og samskipta svo nokkur dæmi séu tekin. Hugmyndir sem fyrir nokkrum árum komust vart lengra en inn í glærukynningar eru orðnar að veruleika og sífellt bætast nýjar í hópinn.

Tölvuský

Tilurð tölvuskýja (e. Cloud Computing1) er lykilþáttur í þróun undanfarinna ára sem m.a. opnar nýjar leiðir í hópvinnu, gagnageymslu og ýmiskonar tölvuvinnslu án tillits til þess hvernig tækjabúnað eða stýrikerfi notendur eru með. Þessi tækni á ríkan þátt í því hvernig Android hefur getað vaxið með eins undraverðum hætti og raun ber vitni – enda byggir þjónusta á borð við Youtube, Dropbox, Google Drive og Spotify á tölvuskýjum sem geyma gögn og miðla þeim til nær allra tegunda tækja sem geta tengst Internetinu.

Æði mörg snjallforrit nýta sér með einhverjum hætti tölvuský. Notendur geta í dag geymt ljósmyndir sínar, myndskeið, tónlist, skjöl og jafnvel heilu bókhaldskerfin í tölvuskýjum eða þjónustu sem nýtir sér slíka tækni. Allt aðgengi frá mismunandi tækjum – tölvum og snjalltækjum – batnar til muna og möguleikar notenda til að samnýta, deila og miðla upplýsingum verða allt aðrir.

 Skyad

Breyttir tímar

Fyrir fáeinum árum gat það reynst býsna mikið bras að skipta um farsíma. Flókið var að flytja símaskrána yfir í nýja tækið og brugðu menn gjarnan á það ráð að afrita símaskrána á símakortið (SIM-kortið) eða með því að tengja símtækin með gagnaköplum við borðtölvur og “sync” forrit sem oftar en ekki skiluðu gögnunum brengluðum og notendunum pirruðum.

Í dag getur notandi geymt öll sín gögn hjá þjónustuaðilum á borð við Google – símaskrá2, tölvupóst, skjöl3, tónlist4, myndir5 og myndbönd6. Þegar nýtt tæki – sími eða spjaldtölva – er tekin í notkun þarf lítið annað en að skrifa notendanafn og lykilorð til að fá aðgang að öllum þessum gögnum. Skrefin eru einföld og taka einungis fáeinar mínútur.

Tækifæri til að fara nýjar leiðir

Sú gríðarmikla þróun sem dæmin hér að ofan lýsa fela í sér gríðarleg tækifæri fyrir stofnanir og fyrirtæki í öllum geirum – til hagræðingar, endurskipulagningar á verkferlum7 og skilvirkari fjarvinnu, svo einhver dæmi séu nefnd. Það er því eftir miklu að slægjast fyrir íslensk fyrirtæki og stofnanir. Skyldi það líka eiga við um skóla? Það höldum við hér í Snjallskólanum! Hvað heldur þú?

  1. Hér mun ekki verða gerð tilraun til að skýra nákvæmlega hvað tölvuský eru en þess í stað bent á ágæta grein Helga Björgvinssonar á vef Ský.
  2. Símaskrá, netföng og aðrar upplýsingar um tengiliði er hægt að geyma hjá Gmail
  3. Einfalt er að geyma öll skjöl á Google Drive eða Dropbox
  4. Hægt er að geyma eigin tónlist á Google Music auk þess sem streymisþjónusta á borð við Spotify veitir aðgang að nær allri tónlist sem til er.
  5. Fyrir utan Google+ og Dropbox sem bjóða upp á sjálfvirka afritun á öllum myndum sem notendur taka á snjalltæki fyrirfinnast sérhæfðar myndageymslur á borð við Flickr sem bjóða upp á geymslu á ljósmyndum.
  6. Youtube og Vimeo eru dæmi um þjónustuaðila sem bjóða notendum upp á að geyma myndbönd.
  7. Sbr. BPR

Lokað er fyrir athugasemdir.