Frelsið er yndislegt

Android stýrikerfið frá Google er lang útbreiddasta stýrirkerfi fyrir snjalltæki í dag. Gömlu risarnir Symbian og Blackberry (RIM) eru nær horfnir af sjónarsviðinu og enn hefur Microsoft ekki tekist að að hasla sér völl í snjalltækjum. iOS frá Apple, sem fyrir nokkrum árum leit út fyrir að verða sigurvegarinn á snjallsímamarkaði virðist vera að gefa eftir og var skv. greiningarfyrirtækinu Gartner einungis með rúm 14% markaðshlutdeild í öðrum ársfjórðungi 2013 og rúm 12% í þriðja ársfjórðungi.

Forsagan

Vinsældir Android hafa aukist svo um munar á síðustu misserum. Í lok fyrsta ársfjórðungs 2010 var Android með 9,6% markaðshlutdeild en var í lok 3ja ársfjórðungs 2013 með svo mikið sem tæp 82% markaðshlutdeild. Á sama tímabili hefur hlutdeild iOS farið fyrst upp – náði hæst í tæp 24% í lok ársins 2011 – en síðan niður aftur.

Hvernig stendur á vinsældum Android?

Ástæðurnar fyrir vinsældum Android eru sjálfsagt margar. Valfrelsi innan Android er mikið enda geta allir framleiðendur vélbúnaðar framleitt tæki sem byggir á Android – og fjölmargir gera einmitt það enda er mikið úrval Android tækja á breiðu verðbili. Þeir sem velja Android hafa því úr fjölmörgum kostum að velja.

Valfrelsið er ein birtingarmynd þess sem einna helst einkennir vinsælasta stýrikerfi í heimi: Android er opið! Android er það sem kallað er „Open Source“ sem felur í sér að sá hugbúnaðarkóði (e. source code) sem stýrirkerfið samanstenduer af er opinn og aðgengilegur öllum. Þessi eiginleiki felur í sér gríðarlega möguleika þegar kemur að hugbúnaðarþróun sem „lokuð“ stýrikerfi sem miðstýrt er af einum aðila bjóða síður. Þessi eiginleiki felur í sér einn helsta styrkleika Android og birtist hann m.a. í því að mjög stór og breiður hópur fólks kemur að því að rýna og betrumbæta stýrikerfið auk þess sem mjög gott er að þróa hugbúnað ofaná Android.

Fólk kýs frelsi. Fólk vill stjórna sínum snjallsíma og ekki láta takmarka sig eða loka sig inni. Þess vegna verður Android fyrir valinu hjá svo mörgum, ekki síst þeim sem eru lengra komnir.
Sveinn Tryggvason, TVR

Almennir notendur hafa einnig tekið Android fagnandi. Forskotið sem Apple iOS var með í árdaga snjallsímans er horfið. Tengimöguleikar milli Apple-tækja fyrir tónlist, myndir og fleira sem var nær ógerningur að leika eftir í PC-heiminum eru í dag leikur einn – þökk sé tölvuskýjum.

Flestir snjalltækjanotendur nýta sér nú þegar „skýjaða“ þjónustu á borð við Dropbox, Google Drive, Spotify, Trello og Evernote.

Styrkur þjónustu í tölvuskýjum felst ekki síst í óhæði gagnvart stýrikerfum. Notendur þurfa ekki lengur að „fórna frelsi sínu“ og leggja öll sín egg í eina körfu til að ná fram snurðulausu samspili milli tækja.

Krafa dagsins er samspil óháð stýrikerfum enda vilja og þurfa fyrirtæki og stofnanir jafnt sem einstaklingar eiga samskipti og viðskipti þvert á tíma og rúm – og vitaskuld þvert á stýrikerfi. Það er því keppikefli allra sem vilja sjá skilvirkari, einfaldari og ódýrari samskipti að staðið sé vörð um frelsið sem þrífst utan múranna með open source. 

Í nýlegri auglýsingu fyrir Android síma frá Samsung má sjá  hvernig lögð er áhersla á að notandinn haldi frelsi sínu.

Lokað er fyrir athugasemdir.